Ekran nga Dell me rezolucion interesant

Si mund të jetë rezolucioni interesant, pyesni? Epo, thjesht: jemi mësuar me ekranet me diagonale prej 23, 24 e 27 inç me rezolucion 1.920 x 1.080, apo madje ata prej 30 inçësh me rezolucion 2.560 x 1.600. Ekrani i ri LCD nga Dell sjell disa risi në këtë drejtim.

Në fakt, Dell SP2309 është ekran LCD me diagonale prej 23 inç dhe QWGA rezolucion prej 2.048 x 1.152 piksela. Edhe pse kjo është vetëm pak më i madh se 1.920 x 1.080, sigurisht do të intrigojë ata për të cilët diagonalja prej 27 e 30 inç është tepër e madhe, e të cilët dëshirojnë të shfrytëzojnë secilin inç të ekranit të tyre 23 inçësh.

Specifikat tjera janë shumë të mira: kontrast prej 80.000:1, koha e përgjigjes dy milisekonda, kamerë të integruar uebi me rezolucion prej dy megapikselash si dhe hyrjet VGA/DVI/HDMI.

Nuk dihet saktësisht se kur kjo pajisje do të paraqitet në treg, por do të duhej shumë shpejt, derisa çmimi do të duhej t'i jetë rreth 420 dollarë amerikanë.